Despois da guerra, do exilio, da morte, da soidade, do amor, da consagración… Despois de corenta anos, a actriz regresa á patria da súa infancia na xira teatral da obra El Adefesio, de Rafael Alberti. Aquela nena que fuxiu alén dos Pirineos, medrou para converterse na gran intérprete da escena e do cinema francés, no símbolo da España refuxiada, na lembranza dunha Galicia perdida na brétema do pasado. Será nesa néboa onde deberá adentrarse para atopar o significado dunha vida chea de éxitos e perdas, onde as pantasmas que camiñan pola súa memoria a axudarán a responder á verdadeira razón desta viaxe: quen é María? Despois das ondas é unha peza teatral sobre a vida e a carreira profesional da actriz coruñesa María Casares, unha das creadoras escénicas máis destacadas e influentes do século XX. Galardoado co prestixioso Premio Rafael Dieste de Textos Teatrais da Deputación da Coruña no ano 2017, o texto estrutúrase como un monólogo dramático no que a personaxe protagonista dialoga co seu pasado e o seu presente ao longo de doce escenas.