Nerea Brey

Nerea Brey (Lalín, Pontevedra; 1987)

Actriz, dramaturga, directora, docente de arte dramática e narradora oral. Licenciada en Xornalismo pola Universidade de Santiago de Compostela, titulada en Interpretación pola Escola Superior de Arte Dramática de Galicia e mestrado en Artes Escénicas pola Universidade de Vigo.

Interpreta o papel de María Casares na produción teatral Despois das ondas, de ButacaZero (2019), e nas visitas teatralizadas á Casa Museo Casares Quiroga do Concello da Coruña (2022). Forma parte do elenco de Soga e Cinsa (2021), de Aporía Escénica, compañía coa que tamén leva a escena 6 cubos negros en corpo branco (2017). Asume varios personaxes na obra O Péndulo (2022), de Inversa Teatro. Crea, xunto coa artista Miriam Rodríguez, a micropeza Deshabitada (2023) para o programa Violencia Zero da Deputación de Pontevedra (2023). Actúa en Illas Desertas (2023), de ArtesaCía. Cabe destacar, ademais, a súa participación nos espectáculos da compañía Feira do Leste: Exilio das moscas (2016) e Tras Tannhäuser (2018), este último beneficiario das Ayudas Creación Joven do INJUVE.
Traballa con Abismo Caracol protagonizando a obra Entelequias (2020), maila película co mesmo título, e intervindo no filme El cuarto de mona (2021). A súa experiencia no audiovisual inclúe tamén a serie Rapa (2024), de Movistar Plus+ e Portocabo; a longametraxe 13 Exorcismos (2022), de Atresmedia Cine e Bambú Producciones; e O bosque de levas (2007), de Ficción Producciones.

Imparte clases de Dicción e Expresión Oral na Escola Superior de Arte Dramática de Galicia durante o curso 2021/2022. En 2023 é galardoada co 18º Premio Abrente de Textos Teatrais pola peza Manual de patronaxe. En 2024, dirixe Cancións amarelas, flores tristes, primeiro espectáculo da compañía Manekineko, da que é cofundadora.